شارك برايك في مافعله منتظر الزيدي واطلاق سراحة

تعليقاتكم: اطلاق سراح منتظر الزيدي


افرجت السلطات العراقية الثلاثاء 15 سبتمبر/أيلول عن منتظر الزيدي الصحفي الذي رمى الرئيس الامريكي السابق جورج بوش بفردتي الحذاء.

وكانت المحكمة الجنائية المركزية قد حكمت على الزيدي بالسجن ثلاث سنوات إلا أن محكمة التمييز قررت تخفيف عقوبة السجن الى سنة واحدة، وفي النهاية تم الافراج عنه بعد 9 شهور بالسجن.

العراقيون منقسمون في موقفهم تجاه الزيدي، بين من يرى ان حادثة الحذاء اساءت الى سمعة العراق وان الزيدي استغل السماح له بالاقتراب من الرئيس الأمريكي لتحقيق ما يصفه البعض باهداف شخصية.

آخرون يدافعون عنه وعن ما قام به وينظرون اليه على انه يعكس مشاعر الكثير من العراقيين.

ما رأيك انت؟ كيف تفسر العروض المالية والدعم الاعلامي والشعبي العربي للزيدي؟

هل تعامل القضاء العراقي بليونة مع الزيدي ام ان ما قام به لا يبرر سجنه اطلاقا؟

يالنسبة الي عشت ايدك يامنتظر وانت وقندرتك(اعذروني عن التعبير)على راسي من فوق
اما بالنسبة للقاضي الي سمح باطلاق سراحة فعلى راسي ولو يحلي الشرع ابوسة من راسة
اتمنى ان نسمع اراكم ونتناقش بيها
مع تحياتي تقبلوا موضعي
شكرا

راح انطي رأي بكلمتين وما اريد اكول غيرهن
هو شجاع بس متهور
تحياتي الكم وما اريد احد يزعل عن الي كاتبه
تحياتي ماسه ع الطرح

عاشت ايدج ماســــــــه على الموضوع الجمــــــــيل...

محمود العكيدي ممكن اسئلك سؤال
اذا اكو شخص هجم على بيتك وطلعك منة ابحجة ان يصلحة وبعدين هدمة وقتل (لا سامح الله واسم الله عليهم)اخوانك ويتم اطفالك واختصب عرضك (انا اسفة بس هذا سؤال افتراضي اسم الله على اهلك والله يخليك الهم وخليهم الله ويحفظهم بس انا دااناقشك بردك اعذرني)بعدين يجيك ويكلك انا اسفة بدون ان يصلح اي شي ويعوف كل شي على غرابة وقبل مايعوفك يكلك اصلا طبيتي البيتك جان خطأ انا احب ان اعتذر ممكن اعرف شنو حتكون ردت فعلك وخاصة من كال ان الدخول الى دارك كان خطأ؟؟؟؟؟؟؟؟؟؟؟؟؟؟؟؟؟؟؟؟؟
اتمنى الرد على السؤال ووقتها حنعرف منو هو الي اسرع انت لو منتظر
(انا اسفة بس انا احب ان اناقش واتناقش شكرا على رايك واتمنى الرد)

احترم ارائكم لكن مهما كان هو اهن دولة لزم ياخذ جزاة
مثل لو اجة خطار عليك للبيت اخوك اجاوز عليها شسوي لخوك؟
اشكرة لو اتعاقبة

رايك صحيح اسير الصمت بس ممكن انت هم اجاوب عن السؤال الي سالتة لمحمود العكيدي
شكرا على المرور

هلو ماسه
اني اعرف وانتي تعرفين منو جاب الامريكان للعراق وهاي ميتناقشون عليها اثنين عقال اوكي
وبالنسبه لمنتظر فالقندره لا اتقدم ولا اتأخر ومسوت شي ولتكليلي هزم بوش اعلاميا هذاك بوش
وشوفي منتظر وين حطته الحكومه العراقيه الي هي مو عراقيه فمنتظر اهنانه بحكم الضعيف
هو وغيره فخلي يسوون مثل ماسوه الرسول صلى الله عليه وسلم بنشر الدعوه لمن جانو ضعفاء نشرها سرا
فمنتظر لو نافع مقاومه اعلاميا هواي احسن وهسه اني متأكد منتظر لو يرجع الزمن ليوره ميسويها بعد
واذا منتظر بطل ليش عايف العراق هسه و الجواب طبعا لأن يخاف وماعنده مبدأ يظل عليه
اما بالنسبه لأسير الصمت احب اعلق على كلامه مال خطار هو بوش شخص او مثل متكول انته خطار
فهو شخص غير مرغوب بي بالعراق وخلي اسألك بنفس جوابك هسه انته تكره واحد واشتره بيتك غصب عنك
وانتي كاعد في بيتك هسه ايجار ويطب ويطلع بالبيت ابكيفه شسويله اتكله شكرا لأن اخذت البيت لو اتعاقبه
ومع هذا فتصرف منتظر غلط غلط غلط ناتج من عدم وعي ولأغراض سياسيه ومنتظر ميطلع من السجن
لما العراق مقبل على انتخابات مو صحيح ويله اني طولت عليكم تحياتي

حجيك صحيح محمود وعى راسي وانا وياك
بس ليش الكل كال ان موقفة سياسي ليش محد فكر ان يكون موقفة انساني انت اكيد مريت ابحالاتت غضب وسويت اشياء تندم عليها
ليش منشوف الموضوع على انة هو قضى ست اسنين من حياتة اشوف اشياء احنة انشوف بشكل مفرد التعذيب بالسجون القتل الخطف التهديد التهجير وهذا طبيعة عملة كصحفي قبل بيوم من المؤتمر جان منتظر ايطلع تقرير عن الايتام ابحدى المناطنق الشعبية هو راح للمؤتمر بصفتة صحفي وكعد وسمع بوش للنهاية لو غاية سياسية ليش مظربة من بداية المؤتمر بوش استفزة كانسان يمتلك مشاعر من كال الحرب على العراق غلطة اذكر كلشي صار وية خلال ست اسنين بس اهم شي اذكر الاطفال الي ماالهم ذنب والي حتى الحجر لو شافهم جان لان لضروفهم الصعبة وتشردهم انا مااريد ان انطيل انت برايك هذه الذكريات مجان حركت انسانيتك وخلتك تتصرف تصرف طائش اي طائش انا اعترف تصرفة جان طائش بس بنفس الوقت ينم عن انسانية

اي ماسه كلامك صحيح والواحد لازم يحط كدامه كل الاحتمالات ومنها دافع انساني او سياسي
اوغيرها وكل شخص يشوف الموقف بالزاويه الي يحب يشوفها بس اني ما ابعد عنه احتمال
دافع انساني الله اعلم وبس هو يعرف الجواب الصحيح
واسمحيلي ان امسح ردي القبل هذا لأسباب سياسيه هههههههه حبيت بس اوصل الفكره
الج اوكي اذا اتقبلين امسح الرد السابق الي كليلي ومراح امسحه الا بموافقتج
وتحياتي الج ولأسلوبك اللطيف والممتع
سلالالالالالالالالام

شكرا اول شخص اكلي اسلوبس ممتع انا اسلوبي عدائي عادة
المهم هو ردك الي تريدة سويه بس اتمنى مااتمسحة انت دااتعبر عن رايك الشخصي وهذه حريتك ميحتاج اتخاف من رايك
اذا تريد تمسحة انا ماعندي مانع بس اتمنى اتبقية علمود الاعضاء يتمتعون بالمناقشة الي بيناتنة والي كل وحدة تطرح وجهة نظر مختلفة ويشوفون اي واحد يقنعهم ويشاركون ابرايهم
شكرا على المرور

اني ابد ما اخاف من شي اني مقتنع بي بس اني مجنت احب اواجهه احد مخالف لرأيي
وميتقبل الكلام واني ما احب اجرح احد حتى لو ابكلمه مهما كان ذلك الشخص واني مقتنع
بكل كلمه كايلتها ومراح امسح ردي الخاطرج

شكرا الاختلاف بالرائي لا يفسد بالود قضية
شكرا مرة ثانية ودوم تبقة مااتخاف وحتى لو ازعل احد او تزعجة هذا رايك وانا من واجبي ومن واجب كل انسان ان يحترم هذا الراي
ولولا اختلاف الاذواق لبارت السلع صح لو غلط
شكرا على رايك ومشاركتك وانا احترمة ومايدتك في بعض منة مو كلة بس اهم شي ان اعرف رايك واتناقش بية وياكم والكل يستفيد

اي صحيح كلامج على راسي صحيح
زين الي يكتم صوتك شتكولين عليه مثل مسوه اسير الصمت وانتي تعرفين شسوه

شكرا على الموضوع
اني راي بل موضوع هومثل راي اخي اسير الصمت لان هذا ما يمثل راي الشعب جميعهم انما يمثل فئة
واتمنى تبتعدون عن سياسة لان ياخذ مجال اكثر من الازم
وردي على اخ محمود بان ماتصف الحكومة بانها لاعراقية مو من حقك لان الحكومة انتا انتخابتها
وثاني شي مايفعلها اسير الصمت هو من حقها لان هو مدير منتدى
اتمنى تقبولون مروري

حبي امبراطور اني ماعندي مدير منتدى يعني انته من مدير منتدى اتخاف تنطي رأيك طبعا متحجي ع الحكومه
واتمنه انوا متنتقد احد برأيك واني حر برأي

شكرا على مروركم العطر
انا احب ان تنطون ارائكم كبشر وعراقيين اسم الموضوع شارك برائيك واتمنى ماتنتقدون اراء بعض لان كل واحد الة راية الخاص ولولا اختلاف الاذواق لبارت السلع
ويااخي الامبراطور احنة عراقيين وهذا منتدى للجميع ومن حقي ان اعرض اي موضوع مهما كان انا صحيح اول مسجلت كانت مواضيعي عن الثقافة ةالشعر بس الانسان لازم يتوسع فكرا وافاقا
اما يااخي يا محمود اتمنى ماانجيب اسماء الاعضاء ومانتقد تصرفاتهم كل واحد عندة سبب وانا اسير الصمت شرحلي كل شي وانا متفهمة موقفة انا مازعلانة من احد بس هو ابموقف المسؤؤل ولازم يمنع الحزازيات بالاضافة هو شخص متفهم ودائما يساند الجميع ويحاول ان مايكون اكو حزازيات بين الاعضاء بالاضافة هو من دعاني للمنتدى وانا اتشكرة واخذ راية ابكلشي وماحاول ان يكتم صوتي انت اكثر واحد تعرف هذا الحجي
انا اريد اعرف راي الشارع وخاصة الشباب لااكثر ولااقل لان انا ظرفي ميسمحلي ان اكون بالشارع بس هذا مو معناه ان ابتعد عنة ومااعرف شنو يصير وخاصة انا عندي امكانية ان اعرف

لا ماسه اسمحيلي هو كتم صوت الاعضاء بغلقه للرسايل الخاصه ممكن اعرف السبب منج
بما انوا انتي اتكولين مكتم صوتج زين هذا شيسموا لعد
وثانيا اني ما أتكلم على رأي احد بس اتكلم عن تصرف محلوا وهو غلق هاي الرسايل
واتصور هذا من حقي

مساء الخير جميعا
كل كلامكم صحيح وارائكم الكم حق بيها بس نسيتوا شغله وحده شنو نظره الشعوب عن المواطن العراقي يعني هل من الممكن انه الانسان يعبر عن غضبه بهذي الطريقه واسمحولي ان اسميها الهمجيه لان الانسان مهما يكون في قمة الغضب بس ميتصرف هيجي لان كل شخص يعكس تربيته ومنتظر الزيدي مثل الشعب العراقي امام الفضائيات فهل هذي اخلاقنا احنه العراقيين؟؟؟
بغض النظر عن الشخص الي كان مقصود بتصرف منتظر فتصرفه اكبر خطا لان بهيجي مواقف دتتشوه سمعة العراقيين وان كان الشخص المقصود بوش وارجع واكول كل شخص يعكس اخلاقه وتربيته ومداقصد بكلامي الاساءه الى منتظر بس تصرفه جان محلو

يريد يتكلم وي عضوة يتكلم عن طريق العام ويعبر عن اراء
مو مثل ما سوي اخ محمود يرسل رسائل خاصة
اتمنى من محمود عدم تطرق الى امور تخص ادارة منتدى
ثاني شي هذا موضوع ما رسائل اجابة الى موضوع منتظر

اخ محمود احنة ماالنة علاقة بالرسائل هذا مو موضوعنة
بعدين هو مدير المنتدى ومن حقة ان يسوي اي شي يحسة حياذي الاعضاء بعدين انا شخصيا سئلتة عن الرسائل وكال اكو اعضاء اشتكوا وداتجيهم ازعاجات على الرسائل
بعدين هو لو يريد يمنع صوتنة مو يمنع الرسائل يمنع المواضيع
مثل السياسية والي نصحني الامبراطور ان ابتعد عنها او جان منع قصائد نزار واي الكل يعرف ان هي لاتلزم بالقواعد والبعض يسميها فاضحة ارجوك محمود هو ديحاول يخلق فرصة لتحاور جدي ومثقف والكل يستفيد منة احنة دايحاول ان يحدث تغيير واحنة لازم نوقف ابجانبة وانت اول واحد لو انا غلطانة
اتمنى محد يخرج عن الموضوع بعدين اكو منتدى شكاوي الي يريد يشتكي انا كل الاريدة اسمع ارائكم
واتمنى مدااسوي مشاكل وان تبتعد عن الحزازيات

اوكي ماسه اني اسف اسف وهاي كلمه الاسف لأن اني خرجت عن الموضوع
مو مثل ميفسرها الاخ اسير كما فسرها سابقا
طبعا ماسه الشارع يكول على منتظر سبع وشجاع واني هم ويه الناس اكول سبع
بس خلي انشوف العواقب الي اجتي من وراء هذه الامور
1/ انسجن لفتره قليله وهو ميطلع لما العراق داخل على انتخابات يعني لو ماكو انتخابات
جان هسه هو بعده بالسجن وهو يعرف والدليل طلع خارج العراق هسه
2/هذا تصرف مو اخلاقي وما احترم الموجودين مثل مكال الاخ اسير يعني هوه شوه صوره
الاعلام العراقي بهذا التصرف لأن الاعلام مو هذا دوره. دور الاعلام كشف الحقائق وبس
3/ تصرفه خلاه يترك العراق ويترك اهله
**************************************
زين خلي نجي انشوف بوش شكال على هذا التصرف
(كال هو صحفي راد يشتهر ويصير معروف فماكو احسن من هيج شهره)
شنو رأيج انتي بكلام بوش؟
*********************************
خلي انشوف الاحتمالات الي خلت منتظر يقوم بهذا التصرف
1/احتمال مثل مكلتي انتي من كثر ميشوف من خراب وقتل بالبلد والايتام وهذا احتمال
2/ الاحتمال الثاني عمل هذا التصرف لصالح حزب معين والاستفاده من هذا التصرف
3/ الاحتمال الثالث وهو كلام بوش بالحلم بالشهره
*************************************
خلي نجي انشوف فوائد هذا التصرف
1/ شهرة منتظر
2/ توجيه كلمه للعالم بأن العراقي مظلوم وبأستطاعته عمل كل شي
3/ بأن الحكومه ديمقراطيه واخرجته من السجن
************************************
راح اني اسألج واتمنى اسمع الاجابه
1/ ليش اختار منتظر هذا الوقت بالتحديد قبل انتهاء فتره بوش بالحكم بأيام واحتمال هي منتهيه
مده حمكه
2/ شنو الي استفاد منه منتظر من جراء هذا التصرف
3/ شنو الي اتغير من واقع العراق بعد تصرف منتظر
4/ هل تعتقدين ان وراء هذا التصرف حزب معين او الحكومه نفسها
5/ ليش الحكومه اخرجت منتظر من السجن بهاي الفتره بالضبط
************************************
اتمنى اسمع الاجابه من كل شخص يحب يجاوب واريد اسمع اراءكم

شكرا اخ محمود ع روحك الرياضية
والاجابة عن اسئلتك
1-جائز لان اجتة فرصة او جان مخطط الها
2-اتفلش صف اسنونة وطلعوا الحرس ابمنظر الوحوش واشتهر
3-كل شي مااتغير غير معامة الصحفيين ازددت سوءا
4-الحكومة لا خاصة ان هي طلعتة قبل الانتخابات لتحسين صورتها الي اشوهت لما اعترف انو هو ديعتذب مع ان رئيس الوزارء كال هو مابي شي
5-مثل مكلت لتحسين صورتها وكسب اكبر عددمن الاصوات في الانتخابات

شكرا على الموضوع